Tam Tam

Fasnacht 2000

Gueten Oobe zämme, sind yyr alli do
zem Schnitzelbängg go singe, sind mir doo yyne koo
wie jedes Joor - yyr kenned s scho - isch s bi uns Brogramm
mr singe zämme noch em Värs Tam Taram Tam Tam
Tam Taram Tam Tam Tam Tam Tam Taram Tam Tam

Dr Haider wird gwäält, Europa schreyt, bald druff sait är ade
jetzt kaame yyn, schyynt s, im Museum näbenem Oetzi gsee
dr Blocher wird zem Gligg nit gwäält dangg em Barlamänt
fuffzig Stimme entspräche genau sym Intelligänzquotiänt

Dunggli Wolgge yber Monaco, muess dr Hauguscht züügle
sy liess sich schaide, sy well e kain, wo anderi däät verprüügle
sig nit druurig, de hesch Qualitäte, das hämmer längschtens gsee
so Lyt sinn gfroogt als Drämmlifierer by dr BVB

Bim TV3 bewirbt sich e Daame, wo zem Robinson wetti
gärn, aber s git zwai Aendrige fir sy, Frau Martinetti
erschtens git s kai Merlot und Pasta - isch e glyych, ich mache mit
zwaitens hämmer gluegt, dass es uff dr Insle kaini junge Männer git

Dr Oogi gratuliert Turin und lyytet dääne aa
är schwätzt änglisch, nit italiänisch, will är daas, schyynt s, besser kaa
hello Luusers, let's make a deal, gif öös bägg Olympia
and you can then als Gäägelaischtig from öös the Expo ha

In dääre Halle kasch s Dach verschiebe, das git e braiti Lugge
ooni die hätt me dr Kool dur d Dyyre miesse drugge
är liggt uff em Ranze und nit uff em Rugge, isch das immer so by de Schwoobe
nai, das sell zaige, do het me yym d Spände yynegschoobe

E gettligi Aura umgit in däm Ruum d Uriella und dä uss Poole
was macht die doo, die het immer gsait en UFO wurd se hoole
d Organ vom Papst sinn luggeloos im Inventar notiert
by sim beschte Stigg stoot hinde draa, das haig är nie beriert
 
Joore lang isch sy Spitze gsi, am Tennisarm gseht me s guet
no besser gsehsch, dass d Schproochentwigglig mit syybe stoppe duet
und dä do isch syt 50 Joor do, erinnere sy sich draa?
und sy, dä blyybt, bis widder e Schwyzer e Abfaart gwinne kaa.

Dä Yygang hän sy verbraitere miesse, jetzt kunsch vyyl besser duure
do in het s grossi Greessene - lueg em Blocher syni Schnuure
e ryysige Ruum fir nur ai Schnuure, git s denn sunscht nit z gsee?
ah nai, do im Egge het s no d Hirni vo dr ganze SVP

Wägem Haider däm Büffel git s laider e Rüffel fir e Schüssel diräggt uss Brüssel
sy nämme em Schüssel dr Schlüssel fir Brüssel, nur d Schwyyz het kai dumme Rüssel
"Freude herrscht", verkindet dr Oogi, nur ai Sanggzion miess sy
s näggschdi Joor sind yyr sicher nit am Lauberhoorn drbyy

Mit "Peep-Peep-Peep" duet dr Gildo mit Abstand erschte mache
das Joor gwinnt "Wadde-hadde-dudde-da", die sinn doch nit ganz bache
sy wääle im Schwarzwald dr Herr Uriella trotz sym Seggdegwand
do hilft nur no ains, e Maschendrahtzaun ums ganze Schwoobeland

8 Ussländer het dr FC Ziiri, drum goot s em Ponte schlächt
het Basel syybe oder zää? Kaine waiss es rächt
dr Jäggi will s wysse, froogt dr Verband, es loot yyn nimm in Rue
"zelle bi unserne Ussländer d Zircher au drzue?" 

Zerscht luegt yyn dr Papst neygiirig aa und beriert yyn zaart
nooch linggs und rächts goots butterwaich, nooch uffe und aabe haart
sy Härz schloot schnäller - s isch s erschte Mool - yyri Gedangge sin nit guet
so isch s wenn är bi sim Babbamobil schalte leere duet

So, das wär s fir hitte gsi vo unserem Schnitzelbangg
hoffendlig hän yyr Fraid dra gha, mr saage härzlig Dangg
wyyterhin e scheene Oobe und e tolls Brogramm
mached s guet bis zem näggschde Mool ­ Eyri zwai Tam Tam
Tam Taram Tam Tam Tam Tam Tam Taram Tam Tam