HERR, üsen liäbä GOTT.
Mir bringed üs und üses Lebä vor Dich.
Bitte nimm's i Dini, alles überschauendä und wüssendä Händ,
und füehre üs!
Nur Du weisch alles, und nur Du bisch fähig,
üs z'leitä, und üs alles zuäz'füehrä, was mir bruched.
Bitte HERR, mach üs offä für Dis Wort, für Dini Offäbarigä,
für all Dini chlinä und grossä Wunder, wo Du üs tagtäglich schenksch, um üs Dini Güeti und Barmherzigkeit z'zeigä!
Alles wämmer schätzä.
Alles wämmer Dir verdankä, grossä GOTT.
Mir priised Dich, Du Wundervollä!
Wiän'ä flauschigi Wattä umhüllsch Du üs und schenksch üs Dini Liäbi. Niämols lohsch üs ellei.
Mit Dir, JESUS, wämmer ganz innig üsen Weg goh.
Du bisch verlässlich und zu 100 Prozent treu.
Alles vo üs wämmer Dir aa'vertrauä und
Dich immer wieder um Din Rot frogä.
Dankä, dass mir dörfed so menschlich mit Dir
durch üses Lebä goh,
dass mir Dir dörfed d'Hand geh und Dich umarmä, und dass Du üs, und üses Denkä und Fühlä, verstohsch,
wiä Niämert suscht.
Dankä, LIÄBSCHTÄ, dass Du üs niä verstossisch, wämmer Unrecht toh händ, dass Du üs nöd aa'chlagsch und abä'machsch,
und üs trotz all üsnä Fehler immer wieder hilfsch,
uf dä richtigi Weg z'cho oder z'rugg z'findä.
Mir chömmed vor Dich, liäbä GOTT, und legged Dir alles anä, damit Du dörfsch entscheidä, und damit Du dörfsch Din Willä und Weg für üs und a üs verwürklichä.
Mach üs starch im Glaubä, HERR! Mach üs zum Kämpfer, wo für Dich ii'stoht, wo Dich verkündet und wiitertreit!
Chumm Du i üsi Gedankä und sprich us üs, damit mir die richtigä Wort finded, um Dich z'bekennä, und vieli neui Menschä für Dich z'begeischterä!